Lolotoe, 21 Abril 2023: Komisáriu Ezekutivu Servisu Tékniku, Eng. Latino Jerónimo ho komitiva hamutuk ho Administrador Postu Lolotoe, Autoridade Suku no Polisiál, Sexta semana ne’e, ofisiálmente halakan ona eletrisidade ba komunidade iha Suku Guda, Postu Administrativu Lolotoe, Munisípiu Bobonaro, liu-husi Projetu Eletrifikasaun Nasionál (PEN). Xefe Suku Guda Sr. Caetano Fanscisco sente kontente no agradese Governu Da-Ualu tanba liu-husi EDTL, E.P ne’ebé aprova ona proposta ba implementasaun projetu eletrifikasaun iha Suku Guda. “Durante tinan barak desde beiala nia tempu to’o ita ukun-an ami iha suku ida ne’e la asesu bà eletrisidade, maibé ohin ami komunidade uma-kain 137 iha Aldeia rua hanesan, Aldeia Zoilpo ne’ebé asesu ona eletrisidade. Maske nune’e iha Aldeia rua seluk mak dadaun ne’e seidauk asesu, tanba ne’e rekomenda ba EDTL, E.P dada mos liña eletrisidade ba Aldeia rua refere”. Projetu Eletrifikasaun Nasionál pakote 34 ne’ebé implementasaun iha Suku Guda, hahu lansa tenderizasaun iha meadu 2022, maibe tanba geografikamente suku ne’e iha liu rural, difikulta kompaña sira atu halo mobilizasaun meteriais eletrisidade ba local projetu, tanba ne’e foin finaliza iha Dezembru tinan kotuk. Hateten Eng. Latino Jerónimo, Komisáriu Ezekutiva Servisu Tékniku. “Parabèns ba komunidade sira ne’ebé asesu ona eletrisidade maibe EDTL, E.P fo atensaun atu uza enerjia elétrika ho seguru no kuidadu nune’e labele afeta vida, ba benifisiáriu sira favor labele halo ligasaun mesak, tanba enerjia eletrika ne’e perigu, karik presiza asistênsia tékniku ruma kontaktu EDTL, E.P Munisípiu Bobonaro nune’e apoiu ita bo’ot sira”. Nia Akresenta, EDTL, E.P iha papél no responsabilidade atu fornese enerjia elétrika ba uma-kain hotu iha teritóriu, garante kualidade fornesimentu inklui hasae reseitas. Tanba ne’e, Suku Guda foin asesu enerjia elétrika EDTL, E.P fo gratuitu de uzu durante fulan 5, hafoin ne’e tékniku EDTL, E.P sei mai sosializa no monta kontador prepagu. Enkuantu uma-kain tolunulu resin ualu(38) iha Aldeia Anon no Guda-Thaz ne’ebé seidauk asesu eletrisidade, EDTL, E.P sei konklui prosesu iha tempu besik. Projetu konstrusaun no instalasaun nova liña media tensaun distânsia liña kilómetru ida resin (1,5 KMs), Baixa tensaun kilómetru rua (2 KMs) inklui instalasaun Transformador 50 KVA ida iha Aldeia Zoilpho. Projetu refere gasta orsamentu Dólar Amerikanu, Rihun Atus Ida Resin ($ 126, 237.47) no benifisia uma-kain 137 asesu eletrisidade.